1	GEN 1:1	Gêdêŋ ŋamatanô Anôtô kêkêŋ undambê to nom.
5	GEN 1:5	Anôtô kêsam ŋawê gebe “Geleŋŋa” ma ŋakesec gebe “Gêbêcauc.” Tec gêbêcauc to geleŋŋa tonaŋ kêtu bêc ŋamataŋa.
6	GEN 1:6	Go Anôtô kêsôm gebe “Lênsaŋ teŋ êniŋ bu êŋgic ma êwa bu êkôc.”
8	GEN 1:8	Ma Anôtô kêsam lênsaŋ tau gebe “Umboŋ.” Gêbêcauc to geleŋŋa tonaŋ kêtu bêc kêtu luagêcŋa.
9	GEN 1:9	Go Anôtô kêsôm gebe “Bu, taŋ kêpoac umboŋ ŋalabu naŋ, êlêc sa naêpoac tauŋa e gamêŋ ŋakeleŋ êsa.” Ma ŋanô kêsa.
10	GEN 1:10	Ma Anôtô kêsam gamêŋ ŋakeleŋ gebe “Nom” ma bu ŋatoŋ gebe “Gwêc.” Ma Anôtô gêlic gebe ŋajam.
11	GEN 1:11	Go Anôtô kêsôm gebe “Gêŋ êlêc ŋamatac aŋga nom, gêŋ tolauŋ taŋ êkêŋ ŋawê êtôm ŋakaiŋgeŋ naŋ, ma ka taŋ sênam ŋanô êtôm ŋakaiŋgeŋ naŋ.” Ma ŋanô kêsa.
13	GEN 1:13	Gêbêcauc to geleŋŋa tonaŋ kêtu bêc kêtu têlêacŋa.
14	GEN 1:14	Go Anôtô kêsôm gebe “Ja ŋanô sêkô umboŋ ŋalênsaŋ e sêwa geleŋŋa to gêbêcauc êkôc ma têtu têm to bêc ma jala ŋabelo.
19	GEN 1:19	Gêbêcauc to geleŋŋa tonaŋ kêtu bêc kêtu aclêŋa.
20	GEN 1:20	Go Anôtô kêsôm gebe “Bu to gwêc sêkôc gêŋ mateŋ jaliŋa palac-palacgeŋ to moc sêlôp sêmoa nom to umboŋ ŋasawa,” e ŋanô kêsa.
22	GEN 1:22	Go Anôtô gêjam mec êsêac ma kêsôm gebe “Asu ŋalatu ma atu taêsam e anam bu to gwêc auc ma moc têtu taêsam sêmoa nom.”
23	GEN 1:23	Gêbêcauc to geleŋŋa tonaŋ kêtu bêc kêtu lemeŋ teŋŋa.
24	GEN 1:24	Go Anôtô kêsôm gebe “Nom êkôc gêŋ mateŋ jali tokaiŋ-tokaiŋ, gêŋ masiŋ ma gêŋ, taŋ sêgalab to sêlêgeŋ naŋ ma bôc saleŋŋa tokaiŋ-tokaiŋ.” Ma ŋanô kêsa.
26	GEN 1:26	Go Anôtô kêsôm gebe “Takêŋ ŋamalac têtôm aêac tauŋ katuŋ, têtôm aêac. Êsêac têtu i gwêcŋa to moc umboŋ ŋalabuŋa ma gêŋ masiŋ to bôc saleŋŋa samob ma gêŋ, taŋ sêgalab to sêlêgeŋ samob, taŋ sêmoa nom naŋ ŋatau.”
35	GEN 2:4	Anôtô kêkêŋ undambê to nom ŋanô kêsa ŋamiŋ tau tonec. Gêdêŋ taŋ Apômtau Anôtô kêkêŋ nom to undambê
38	GEN 2:7	Gêdêŋ tonaŋ Apômtau Anôtô kêkôc nom aŋga kôm ma kêlêsôb ŋamalac to gêju awajaô mata jaliŋa kêsô eŋ lususuŋ, tec ŋamalac kêtu gêŋ mata jali.
39	GEN 2:8	Go Apômtau Anôtô kêsê kôm aŋga Eden, taŋ gêc gêmu kêsa gamêŋ oc kêpiŋa naŋ, ma ketoc ŋamalac, taŋ kêlêsôb naŋ, gêmoa kôm tau.
44	GEN 2:13	Bu ŋasêli kêtu luagêcŋa ŋaê gebe Gihon. Bu tonaŋ kêgi gamêŋ Kus.
49	GEN 2:18	Go Apômtau Anôtô kêsôm gebe “Ŋamalac taugeŋ êmoa oc ŋajam atom. Aê gabe jakêŋ kêpuctôŋo teŋ êndêŋ eŋ, taŋ êtôm eŋ naŋ.”
54	GEN 2:23	Go ŋamalac kêsôm gebe “Kecgoc, galoc katap ŋatêkwa aŋga aêŋoc sa ma ŋamêsôm aŋga aêŋoc amboac tonaŋ. Aê gabe jaê ênê ŋaê gebe ‘Ŋamalaco’ gebe sêkôc aŋga ŋamalacnê.”
58	GEN 3:2	Go awê kêsôm gêdêŋ moac gebe “Aêac aniŋ kôm ŋakaŋanô,
65	GEN 3:9	Go Apômtau Anôtô gêmôêc ŋamalac ma kêsôm gêdêŋ eŋ gebe “Gômoa ondoc.”
67	GEN 3:11	Go Anôtô kêsôm gebe “Asa kêsôm gêdêŋ aôm gebe ôlim ŋaôma. Aôm goeŋ kaŋanô, taŋ gajac jao gêdêŋ aôm gebe ôniŋ atom naŋ, me masi.”
69	GEN 3:13	Go Apômtau Anôtô kêsôm gêdêŋ awê gebe “Aôm gôgôm asageŋ tonaŋ.” Awê gêjô eŋ awa gebe “Moac kêtim aê, tec gaeŋ.”
74	GEN 3:18	Gêŋ têkwa-têkwa to waôŋ êtu nêm kôm ŋanô ma ôniŋ ŋagêŋgaga.
78	GEN 3:22	Ma Apômtau Anôtô kêsôm gebe “Alic acgom, ŋamalac kêtôm aêac ma kêjala ŋajam to sec. Galoc tec tajop eŋ gebe êmêtôc lêma naêpip kaŋanô aŋga ka daŋgôŋ mateŋ jaliŋa ma êniŋ e êmoa teŋgeŋ nec atom.”
88	GEN 4:8	Go Kain kêsôm gêdêŋ lasi Abel gebe “Tana kôm.” Agêc sêô lasê kôm su, go Kainnê ŋalêlôm gêli sa ma gêjac lasi Abel êndu.
89	GEN 4:9	Go Apômtau kêsôm gêdêŋ Kain gebe “Lasim Abel gêmoa ondoc.” Eŋ kêsôm gebe “Aê gajam kauc. Aê katu lasicnê gejobwaga me.”
94	GEN 4:14	Gôlicgac me, galoc aôm kôtiŋ aê su aŋga nom ma jasiŋ tauc ôkwi aŋga laŋômnêmŋa. Matoc kanôŋ jasêlêŋ ôŋôŋgeŋ janac laoc gamêŋgeŋ ma lau, taŋ têtap aê sa naŋ, sênac aê êndu.”
106	GEN 4:26	Ma Set kêka latu teŋ lasê ma gê eŋ gebe Enos. Gêdêŋ têm tonaŋ lau aweŋ gêjac Apômtau kêtu ŋamata.
107	GEN 5:1	Adamnê wakucnêŋ ŋadênaŋ tau tonec. Gêdêŋ taŋ Anôtô kêkêŋ Adam naŋ, kêkêŋ eŋ kêtôm eŋ tau.
109	GEN 5:3	Gêdêŋ taŋ Adamnê jala kêtu 130 naŋ, kêka latu teŋ lasê kêtôm eŋ ma kêtôm eŋ tau katu ma gê ênê ŋaê gebe Set.
112	GEN 5:6	Gêdêŋ taŋ Setnê jala kêtu 105 naŋ, kêka latu Enos lasê.
115	GEN 5:9	Gêdêŋ taŋ Enosnê jala kêtu 90 naŋ, kêka Kenan lasê.
118	GEN 5:12	Gêdêŋ taŋ Kenannê jala kêtu 70 naŋ, kêka Mahalalel lasê.
121	GEN 5:15	Gêdêŋ taŋ Mahalalelnê jala kêtu 65 naŋ, kêka Jared lasê.
124	GEN 5:18	Gêdêŋ taŋ Jarednê jala kêtu 162 naŋ, kêka Enok lasê.
127	GEN 5:21	Gêdêŋ taŋ Enoknê jala kêtu 65 naŋ, kêka Metusala lasê.
131	GEN 5:25	Gêdêŋ taŋ Metusalanê jala kêtu 187 naŋ, kêka Lamek lasê.
134	GEN 5:28	Gêdêŋ taŋ Lameknê jala kêtu 182 naŋ, kêka latu teŋ lasê.
138	GEN 5:32	Gêdêŋ taŋ Noanê jala kêtu 500 naŋ, kêka Sem agêc Ham ma Japet lasê.
139	GEN 6:1	Gêdêŋ taŋ ŋamalac sêjac m gebe têtu taêsam aŋga nom naŋ, sêka latuŋio lasê,
141	GEN 6:3	Go Apômtau kêsôm gebe “Aêŋoc Ŋalau êmoa êwiŋ ŋamalac endeŋ tôŋgeŋ atom gebe eŋ toôli nomŋa tec ênê jala êtôm 120geŋ.”
142	GEN 6:4	Gêdêŋ têm, taŋ lau undambêŋa sêjam ŋamalac latuŋio e êsêac sêkôc ŋapalê naŋ, lau waso-waso kaiŋ teŋ sêmoa nom. Ma gêdêŋ têm, taŋ kêdaguc naŋ, amboac tonaŋgeŋ. Lau ŋaclai towae têm andaŋgeŋanôŋa tau tonec.
155	GEN 6:17	Gôlicgac me, galoc aê jakêŋ bu êsuŋ ŋatêna êpoac nom gebe janseŋ gêŋ mateŋ jali samob, taŋ sêwê kaiŋ awajaô mata jali aŋga umboŋ ŋalabu naŋ, su sênaŋa, gêŋ nomŋa samob sêmac êndu.
161	GEN 7:1	Go Apômtau kêsôm gêdêŋ Noa gebe “Ôsô waŋ ôna, aôm to nêm gôlôac samob gebe aê galic aôm amboac ŋac gêdêŋ gômoa aê laŋôcnêm aŋga lau tonaŋ ŋalêlôm.
164	GEN 7:4	Gebe bêc 7 ênaŋa acgom, go jakêŋ kom ênac êtôm eleŋŋa 40 to êmbêcauc 40 ma gabe janseŋ gêŋ mateŋ jali samob, taŋ kakêŋ naŋ, su aŋga nom.”
171	GEN 7:11	Gêdêŋ taŋ Noanê jala kêtu 600 naajôŋ luagêc ma ŋabêc 17 naŋ, bumata nom ŋalêlômŋa samob kêpulu kêpi ma katam umboŋŋa gêlêc su
173	GEN 7:13	Gêdêŋ bêc tonaŋ Noa to latui Sem agêc Ham ma Japet ma nê awê to lawaio wakuc têlêac sêwiŋ êsêac sêsô waŋ sêja.
176	GEN 7:16	Gêŋ mateŋ jaliŋa samob, kapoac teŋ to têna teŋ sêsô waŋ kêtôm Anôtô kêjatu eŋ. Ma Apômtau kêlai eŋ auc.
182	GEN 7:22	Gêŋ samob, taŋ sêsê aweŋ sêmoa masaŋgeŋ naŋ, sêmac êndu.
189	GEN 8:5	Bu kêtaiŋ-kêtaiŋ e gêdêŋ ajôŋ kêtu 10ŋa. Gêdêŋ ajôŋ tonaŋ ŋabêc ŋamataŋa lôc ŋagêdô ŋatêpôê mêŋkêpi.
194	GEN 8:10	Go kêsaê bêc 7 kêtiam, go kêkêŋ balôsi tau gêlôb kêsa gêja kêtiam.
195	GEN 8:11	Gêdêŋ kêtulala moc gêmu gêdêŋ eŋ gêmêŋ ma keseŋeŋ katêkwi ŋalauŋ matac teŋ. Gêdêŋ tonaŋ Noa kêjala gebe bu kêtaiŋ su aŋga nom.
197	GEN 8:13	Gêdêŋ taŋ Noanê jala kêtu 601 ŋaajôŋ ŋamataŋa ŋabêc ŋamataŋa naŋ, bu kêpa aŋga nom. Tec Noa kêkac waŋ ŋasalôm su e gêlic nom ŋakeleŋ kêsa.
198	GEN 8:14	Gêdêŋ ajôŋ kêtu luagêcŋa ŋabêc 27 nom ŋakeleŋ kêsa samucgeŋ.
199	GEN 8:15	Go Anôtô kêsôm gêdêŋ Noa gebe
209	GEN 9:3	Gêŋ mateŋ jaliŋa samob, taŋ sêmoa naŋ, têtu amacnêm gêŋ aniŋŋa. Aê kakêŋ gêŋ tolauŋ gêdêŋ amac su, tec gêŋ ŋagêdô samob amboac tonaŋgeŋ.
214	GEN 9:8	Go Anôtô kêsôm gêdêŋ Noa to nê latui, taŋ sêwiŋ eŋ naŋ, gebe
229	GEN 9:23	Go Sem agêc Japet sêkôc ŋakwê teŋ sêkêŋ gêsac magiŋm ma sêsêlêŋ sênu tauŋgeŋ jasêsaŋ tameŋi ôli ŋaôma auc. Agêc sêkac laŋôŋanô ôkwi sebe sêlic tameŋi ôli ŋaôma atom.
230	GEN 9:24	Gêdêŋ taŋ wain ŋaŋaclai gêbacnê ma Noa gêdi sa naŋ, eŋ gêŋô biŋ, taŋ ŋac sauŋ gêgôm gêdêŋ eŋ naŋ,
237	GEN 10:2	Japet latui tonec Gomer, Magog, Madai, Jawan, Tubal, Mesek ma Tiras.
238	GEN 10:3	Gomer latui tonec Askenas, Ripat ma Togarma.
251	GEN 10:16	Eŋ kêtu lau gamêŋ Jebus, Amor, Girgas,
254	GEN 10:19	Lau Kanaan nêŋ gamêŋ gêc Sidon gêmu kêsô gêdêŋ Gerar ma Gasa to gêmu kêsô gêdêŋ Sodom to Gomora ma Adma to Seboim e gêdêŋ Lasa.
258	GEN 10:23	Aram latui tonec Us, Hul, Geter ma Mas.
269	GEN 11:2	Gêdêŋ taŋ êsêac dêdi aŋga gamêŋ oc kêpiŋa naŋ, sêsêlêŋ e têtap gaboaŋ teŋ sa gêc gamêŋ Sinar ma sêŋgôŋ tonaŋ.
271	GEN 11:4	Go sêsôm gebe “Ajôc, takwê nêŋ malac teŋ sa to andu baliŋ teŋ e ŋatêpôê soso êpi undambê gebe tamboa nêŋ ŋaê sa, gebe têta aêac saliŋ-saliŋ tanam nom samuc auc atom.”
272	GEN 11:5	Go Apômtau kêsêp gêmêŋ gebe êlic malac to andu soso, taŋ ŋamalac latuŋi sêkwê sa naŋ.
302	GEN 12:3	Aê gabe janam mec êsêac, taŋ sênam mec aôm ma êsêac, taŋ sêpuc boa aôm naŋ, aê gabe japuc boa. Gôlôac nomŋa samob têtap mec ŋamoasiŋ sa êtu aômŋa.”
303	GEN 12:4	Amboac tonaŋ Abram gêdi kêtôm Apômtau kêjatu eŋ, ma Lot gêdi gêwiŋ eŋ. Gêdêŋ taŋ Abram gêwi Haran siŋ naŋ, nê jala kêtu 75.
305	GEN 12:6	Abram kêsêlêŋ-kêsêlêŋ e jagêô lasê malac Sikem to kamem, taŋ kêkô More naŋ. Gêdêŋ têm tonaŋ lau gamêŋ Kanaan ŋa sêŋgôŋ gamêŋ tau.
306	GEN 12:7	Go Apômtau geoc tau lasê gêdêŋ Abram ma kêsôm gebe “Aê gabe jakêŋ nom tonec êndêŋ nêm wakuc.” Tec eŋ gêboa altar teŋ sa gêdêŋ Apômtau, taŋ geoc tau lasê gêdêŋ eŋ naŋ.
307	GEN 12:8	Go eŋ gêdi kêpi lôc aŋga Betel ŋagamêŋ oc kêpiŋa ma gê becobo kêkô Betel, taŋ gêc gamêŋ oc kêsêpŋa ma Ai, taŋ gêc gamêŋ oc kêpi ŋa naŋ ŋasawa. Ma aŋga tônê eŋ gêboa Apômtaunê altar teŋ sa ma awa gêjac Apômtaunê ŋaê.
310	GEN 12:11	Gêdêŋ taŋ kêdabiŋ gebe êô lasê Aiguptu naŋ, eŋ kêsôm gêdêŋ nê awê Sarai gebe “Aê kajala gebe aôm awê êjam.
313	GEN 12:14	Gêdêŋ taŋ Abram gêô lasê Aiguptu naŋ, Aiguptuwaga sêlic awê tau gebe awê êjam.
323	GEN 13:4	gêdêŋ gamêŋ, taŋ gêboa altar sa. Go Abram awa gêjac Apômtaunê ŋaê aŋga tônê. aŋga tônê.
326	GEN 13:7	Ma Abramnê bôc ŋagejobwaga to Lotnê bôc ŋagejobwaga aweŋsuŋ gêôc ka tau. Gêdêŋ têm tonaŋ lau gamêŋ Kanaan to Perisŋa sêŋgôŋ gamêŋ tonaŋ.
327	GEN 13:8	Go Abram kêsôm gêdêŋ Lot gebe “Biŋ aweŋsuŋ êôc ka tauŋa ênêc aêagêc ŋasawa to agêcnêŋ gejobwaga ŋasawa atom gebe aêagêc ŋam tageŋ.
328	GEN 13:9	Gamêŋ samuc tonec gôlic atom me. Ôsu taôm su aŋga aê. Embe ôkôc gamêŋ gasêŋa, go aê jana anôŋaŋa. Embe ôkôc gamêŋ anôŋa, go aê jana gasêŋaŋa.”
329	GEN 13:10	Ma Lot gêôc mataanô sa ma gêlic bu Jordan ŋagaboaŋ gebe nom ŋalêsi ŋajam kêtôm Apômtaunê kôm tau, kêtôm gamêŋ Aiguptu e gêdêŋ Soar. Gêdêŋ tonaŋ Apômtau geseŋ Sodom to Gomora su atom tageŋ.
330	GEN 13:11	Tec Lot kêjaliŋ bu Jordan ŋagaboaŋ sa kêtu nê gamêŋ ma Lot kêsêlêŋ gêmu gêdêŋ oc kêpiŋa gêja. Gêdêŋ tonaŋ êsêagêc sêwa tauŋ kêkôc.
338	GEN 14:1	Gêdêŋ taŋ Amrapel kêtu kiŋ Sinarŋa ma Ariok kêtu kiŋ Elasarŋa ma Kedorlaomer kêtu kiŋ Elamŋa ma Tidal kêtu kiŋ Goiimŋa naŋ,
339	GEN 14:2	êsêac sêjac siŋ gêdêŋ Bera, taŋ kêtu kiŋ Sodomŋa ma Birsa, taŋ kêtu kiŋ Gomoraŋa ma Sinab, taŋ kêtu kiŋ Admaŋa ma Semeber, taŋ kêtu kiŋ Seboimŋa ma gêdêŋ kiŋ Belaŋa (ŋaê teŋ gebe Soar).
340	GEN 14:3	Êsêac samob sêpi tageŋ sêsêlêŋ sêwê Sidim ŋagaboaŋ (ŋaê teŋ gebe Gwêc Ŋatoŋ).
344	GEN 14:7	Go sêkac tauŋ ôkwi sêmu sêja En-Mispat (ŋaê teŋ gebe Kades) ma sêkôniŋ lau Amalek nêŋ gamêŋ samob ma lau gamêŋ Amorŋa, taŋ sêŋgôŋ Hasason-Tamar naŋ, amboac tonaŋgeŋ.
345	GEN 14:8	Go kiŋ Sodomŋa to kiŋ Gomoraŋa ma kiŋ Admaŋa to kiŋ Seboimŋa ma kiŋ Belaŋa (ŋaê teŋ gebe Soar) sêja ma sêdênaŋ tauŋ aŋga gaboaŋ Sidimŋa gebe sênac siŋ.
346	GEN 14:9	Sênac siŋ êndêŋ Kedorlaomer, taŋ kêtu kiŋ Elamŋa to Tidal, taŋ kêtu kiŋ Goiimŋa ma Amrapel, taŋ kêtu kiŋ Sinarŋa to Ariok, taŋ kêtu kiŋ Elasarŋa. Kiŋ aclê sêjac siŋ gêdêŋ kiŋ lemeŋ teŋ.
347	GEN 14:10	Ma kolda ŋagêsuŋ gêjam gaboaŋ Sidimŋa auc. Ma gêdêŋ taŋ kiŋ Sodom to Gomoraŋa sêc siŋ naŋ, nêŋ ŋagêdô sêu tauŋ sêsêp gêsuŋ tonaŋ ma lau ŋagêdô sêc sêpi lôc sêja.
348	GEN 14:11	Tec ŋacjo sêjaŋgo Sodom to Gomora nêŋ waba to nêŋ gêŋ taniŋŋa samob su ma sêc sêmu sêja nêŋ gamêŋ.
354	GEN 14:17	Abram kêku Kedorlaomer to kiŋ, taŋ sêwiŋ eŋ naŋ, tulu ma gêmu gêja. Go kiŋ Sodomŋa kêpuc eŋ tôŋtôŋ aŋga gaboaŋ Saweŋa (ŋaê teŋ gebe Kiŋnê Gaboaŋ).